Staðastaður við Sóleyjargötu

Skrifstofa forseta í vetrarbúningi.

Staðastaður, öðru nafni Sóleyjargata 1, hýsir skrifstofu forseta Íslands. Húsið lét Björn Jónsson ráðherra og ritstjóri byggja árið 1912.

Auk þess að vera forystumaður í íslenskum stjórnmálum á sinni tíð var Björn Jónsson faðir Sveins Björnssonar, fyrsta forseta lýðveldisins. Björn var ættaður frá Staðarstað á Snæfellsnesi og af þeim bæ dregur húsið nafn sitt. Síðar eignaðist Kristján Eldjárn þetta hús svo óhætt er að segja að það sé nátengt sögu þjóðhöfðingja Íslands.

Arkitekt Staðastaðar var Rögnvaldur Ólafsson sem var frumkvöðull í íslenskri byggingarlist. Viðbyggingu við húsið Fjólugötumegin hannaði Gunnlaugur Halldórsson. Á gömlum ljósmyndum sést að þegar húsið var byggt var það í útjaðri bæjarins og sunnan þess eða semsé í átt að flugvellinum var dreifbýli.