Forseti ávarpar íslenska læknanema í borginni Martin í Slóvakíu og kynnir sér starfsemi háskólans. Við Jessenius-læknadeild Komeníusarháskóla stundar nú 171 Íslendingur nám í læknisfræði. Áratugur er nú liðinn síðan fyrstu Íslendingarnir skráðu sig þar til náms, árið 2012, og hafa alls 79 íslenskir læknar útskrifast frá háskólanum síðan.

Forsetahjón eru nú í opinberri heimsókn í Slóvakíu og heimsóttu háskólann í Martin af því tilefni. Til fundarins voru einnig boðnir íslenskir nemendur í dýralæknisfræðum við háskólann í Košice í austurhluta Slóvakíu.

Í sendinefnd forseta er Willum Þór Þórsson heilbrigðisráðherra og ávörpuðu þeir nemendur, starfsfólk og stjórn skólans. Einnig tóku til máls Sveinn Karlsson, varaformaður Félags íslenskra læknanema í Slóvakíu, og Andrea Calkovská, rektor læknadeildarinnar. Þá fengu forseti og sendinefnd kynningu á kennsluaðstöðu læknadeildarinnar og spjölluðu við nemendur.