Forseti flytur ávarp við vígslu 300. rampsins í verkefninu Römpum upp Ísland. Haraldur Þorleifsson stendur fyrir verkefninu en forseti Íslands er verndari þess. Römpum upp Ísland var ýtt úr vör í mars á þessu ári í kjölfar góðs árangurs af átakinu Römpum upp Reykjavík. Markmiðið var upphaflega að reisa 1.000 rampa um allt land á einu ári, en framkvæmdir hafa gengið vonum framar og í dag var tilkynnt að markið verði sett hærra, með gerð 1.500 rampa fyrir mars 2023. Athöfnin fór fram í Mjóddinni í Reykjavík, þar sem rampur númer 300 var formlega vígður.