Forseti afhendir Útflutningsverðlaun forseta Íslands á Bessastöðum. Í þetta sinn var það Marel sem hlaut verðlaunin en fyrirtækið hefur haslað sér völl á sviði tæknibúnaðar fyrir fiskvinnslu og aðra matvælaframleiðslu. Hjá Marel vinna um 6000 manns og er fyrirtækið með skrifstofur í 33 löndum. Við sama tækifæri hlaut Hallfríður Ólafsdóttir flautuleikari heiðursviðurkenningu fyrir verk sitt Maxímús Músíkús. Sögur um þessa ágætu tónlistarmús, sem hafa verið þýddar á nokkur tungumál, stuðla að því að opna heim sígildrar tónlistar fyrir börnum. Íslandsstofa er bakhjarl Útflutningsverðlaunanna og gerði Björgólfur Jóhannsson stjórnarformaður hennar grein fyrir verðlaunahöfum.