Að loknum fundum með forseta Póllands á fyrsta degi opinberrar heimsóknar forseta Íslands og forsetafrúar til Póllands lagði forseti blómsveig að minnismerki óþekkta hermannsins í Varsjá, heimsótti pólska þingið og ávarpaði málstofu á vegum Evrópska efnahagssvæðisins um fjármögnun umhverfisvænna framkvæmda. Forsetafrúin heimsótti heyrnarsetur með pólsku forsetafrúnni og ávarpaði fund pólskra kvenna í viðskiptalífinu. Deginum lauk svo með hátíðarkvöldverði í forsetahöllinni.

Á öðrum degi heimsóknarinnar flutti forseti fyrirlestra hjá Lýðræðis- og mennréttindastofnun ÖSE og hjá Varsjárháskóla en frú Eliza átti fund með fulltrúum þýðenda- og rithöfundasamtaka. Um hádegisbil var svo haldið til Gdańsk-borgar við Eystrasalt og þar hófst dagskráin með því að forsetahjónin lögðu blómsveig að minnismerki um þá sem féllu í mótmælaaðgerðum árið 1970. Svo átti forseti óformlegan fund með ríkisstjóra Pommern og annan með borgarstjóra Gdańsk og forsetahjónin skoðuðu safn til minningar um árangursríka lýðræðisbaráttu samtakanna Samstöðu sem áttu rætur í Gdańsk. Í lok dags buðu forsetahjón til móttöku í Artúrshirð, aldagamalli kauphöll í miðborginni.

Á þriðja degi heimsóknarinnar hélt forseti í kynnisferð um hafnarsvæðið með nýju hafrannsóknarskipi Gdańsk-háskóla og heimsótti kæligeymslu við höfnina og skiparannsóknastöð auk þess sem hann ávarpaði málþing um samstarfstækifæri Íslands og Póllands á sviði skipahönnunar og matvinnslutækni. Einnig kom forseti á fund rektora Háskóla Íslands og Háskólans í Gdańsk ásamt Lilju Alfreðsdóttur mennta- og menningarmálaráðherra. Forsetafrúin átti hins vegar fund í Shakespeare leikhúsinu í Gdańsk, m.a. með fulltrúum innflytjenda og Jafnréttisráðs. Heimsókninni til Póllands lauk með því að forsetahjónin skoðuðu safn um heimsstyrjöldina síðari.

Myndasyrpa frá opinberri heimsókn forseta Íslands og frú Elizu til Póllands.