Forseti flytur opnunarávarp á kynningarfundinum „Framtíðin svarar á Íslensku“ í Grósku í Reykjavík. Rætt var um þá áfanga sem náðst hafa í íslenskri máltækni og framtíð tungumálsins samhliða þróun gervigreindar. Forseti sagði frá för íslenskrar sendinefndar sem hann leiddi til Bandaríkjanna vorið 2022. Þar var fundað með forsvarsmönnum tæknifyrirtækja, ásamt menningar- og viðskiptaráðherra og sendinefnd íslenskra sérfræðinga á sviði máltækni. Ferðin markaði upphafið að samstarfi íslenskra máltæknisérfræðinga hjá hugbúnaðarfyrirtækinu Miðeind við bandaríska nýsköpunarfyrirtækið OpenAI. Afrakstur þess samstarfs er innleiðing íslenskrar tungu í framþróun gervigreindarmállíkansins GPT. Tugir sjálfboðaliða hafa unnið að því síðustu vikur að þjálfa nýjustu útgáfuna mállíkansins í því að svara betur á íslensku.
Forseti lagði í máli sínu áherslu á að tækniframfarir á sviði gervigreindar verði að styrkja þá sjálfsögðu viðleitni að efla ólík tungumál heimsins og viðhalda fjölbreytni í samfélagi þjóða. Á fundinum tóku einnig til máls Katrín Jakobsdóttir forsætisráðherra og Lilja Alfreðsdóttir, menningar- og viðskiptaráðherra. Þá tóku þátt í pallborðsumræðum tveir fulltrúar OpenAI, þær Anna Makanju, yfirmaður opinberrar stefnumótunar, og Angela Jiang, vörustjóri hjá OpenAI. Umræðustjóri var Jóhanna Vigdís Guðmundsdóttir, framkvæmdastjóri Almannaróms.
Fyrr um daginn tók forseti á móti sendinefnd OpenAi á Bessastöðum. Þar ræddi forseti einnig við fulltrúa Maóra frá Nýja-Sjálandi. Þeir komu hingað til lands til að kynna sér árangur íslenskrar máltæknistefnu og hvort það fordæmi geti nýst við verndun maórískrar tungu.
Upptöku frá kynningarfundinum Framtíðin svarar á íslensku má sjá hér: