28. júlí 2010
Forseti á fund með prófessor Roger Crofts sem er sérfræðingur í umhverfismálum og skipulagninu þjóðgarða. Rætt var um Vatnajökulsþjóðgarð og skipulagðan aðgang að íslenskri náttúru og vernd hennar í ljósi mikillar fjölgunar ferðamanna sem líkleg er á komandi árum og áratugum.
28. júlí 2010
Forseti ræðir við fjölskyldur frá Ísrael, foreldra, börn og unglinga sem á undanförnum vikum hafa ferðast hringinn í kringum landið. Rætt var um reynslu af slíkum fjölskylduheimsóknum til Íslands, aðbúnað og fyrirgreiðslu heimamanna sem og fegurð íslenskrar náttúru og fjölþætt tækifæri allra aldursflokka til að njóta Íslands.
26. júlí 2010
Forseti á fund með William Ravlin prófessor við Ohio State Háskólann í Bandaríkjunum og Guðrúnu Gísladóttur prófessor við Háskóla Íslands um samvinnu bandarískra og íslenskra vísindamanna á sviði jarðvegsrannsókna, gróðurfars og loftslagsbreytinga. Einnig var rætt um möguleika á víðtækari samvinnu svo sem rannsóknum á viðbrögðum við náttúruhamförum, t.d. eldgosum, flóðum, hvirfilvindum og jarðskjálftum.
21. júlí 2010
Forseti á fund með Stefáni L. Stefánssyni sendiherra Íslands í Japan og fleiri ríkjum Asíu um tækifæri íslenskra fyrirtækja á sviði sjávarútvegs og jarðhita í þessum heimshluta.
21. júlí 2010
Forseti ræðir við hóp bandarískra stúdenta sem stunda nám við sumarskóla RES, Renewable Energy School, um árangur Íslendinga við nýtingu jarðhita og annarra orkulinda, nýjar áherslur á veraldarvísu í nýtingu hreinnar orku, einkum tækifæri Bandaríkjanna á komandi árum, sem og þann árangur sem tækniþróun og vísindarannsókir hafa skilað Íslendingum á þessum vettvangi.
21. júlí 2010
Forseti ræðir við fólk af íslenskum ættum frá Kanada sem heimsækir ættmenn sína á Íslandi.
09. júlí 2010
Forseti afhendir Íslensku safnaverðlaunin við hátíðlega athöfn á Bessastöðum í dag sunnudaginn 11. júlí kl. 15:00, en í dag er haldið upp á íslenska safnadaginn. Dómnefnd tilnefndi þrjú söfn til verðlaunanna, og eru þau Byggðasafn Skagfirðinga Glaumbæ, Heimilisiðnaðarsafnið á Blönduósi og Nýlistasafnið í Reykjavík.
Fréttatilkynning. - Að þessu sinni komu verðlaunin í hlut Nýlistasafnsins.
08. júlí 2010
Forseti á fund með Svani Kristjánssyni prófessor um rannsóknir í stjórnmálafræði og þróun stjórnmálafræðikennslu.
07. júlí 2010
Forseti opnar sýninguna Svipmyndir úr norðursiglingum í
Sjóminjasafni Reykjavíkur, Víkinni. Á sýningunni eru sýndar myndir rússneska ljósmyndarans Robert Lvovich Diament sem hann tók í síðari heimsstyrjöldinni af skipalestum sem sigldu um Norður-Atlantshafið til norðurhluta Rússlands. Siglingarnar voru mikilvægur þáttur í síðari heimsstyrjöldinni og gegndi Ísland þar mikilvægu hlutverki. Fyrir nokkrum árum var haldin ráðstefna á vegum Háskóla Íslands um þessa sögu.
Ávarp forseta.
05. júlí 2010
Forseti hefur sent nýjum forseta Filipseyja Benigno Aquino III, nýjum forseta Póllands Bronislaw Komorowski og nýjum forseta Þýskalands Christian Wulff heillaóskir í tilefni af kjöri þeirra.
03. júlí 2010
Forseti ræðir við Chhaya Bhanti sem sérhæfir sig í sjálfbærri þróun og nýtingu hreinnar orku, einkum með tilliti til Indlands og Bandaríkjanna, um þá tækniþróun og stefnumótun sem felst í reynslu Íslendinga af nýtingu jarðhita á síðastliðnum 40-60 árum. Samstarf Íslendinga og Indlands á sviði hreinnar orku var meðal efnisatriða í opinberri heimsókn forseta Íslands til Indlands í janúar.
02. júlí 2010
Forseti ræðir við nemendur í sumarskóla Rannsóknaseturs um smáríki við Háskóla Íslands. Fjallað var um stöðu smáríkja í samtíð og framtíð, Ísland, Færeyjar og Grænland, sem og smáríki í Evrópu, Evrópusambandið og norðurslóðir. Nemendur í sumarskólanum koma frá mörgum þjóðlöndum í Evrópu.