Umhyggja, félag til stuðnings langveikum börnum

Félagið Umhyggja var stofnað árið 1980 en upphafið að stofnun þess má rekja til þess að fagfólk í heilbrigðisgeiranum taldi að börn sýndu alvarleg streitueinkenni við sjúkrahúsinnlagnir. Fyrsta verk félagsins var að stuðla að því að foreldrar fengju að vera hjá börnum sínum þegar þau væru lögð inn á sjúkrahús.

Fyrstu árin var Umhyggja nær eingöngu félag fagfólks en árið 1995 varð félagið að þverfaglegum regnhlífarsamtökum. Um leið fengu foreldrar sæti í stjórn ásamt fagfólki. Aðildarfélög Umhyggju eru nú 18 talsins.

Umhyggja hefur efnt til samstarfs við við þrenn önnur hagsmunasamtök langveikra og fatlaðra barna. Þar er um að ræða AD/HD samtökin, Styrktarfélag lamaðra og fatlaðra og Þroskahjálp. Þessi fjögur félög hafa sameinast um stofnun Sjónarhóls sem er ráðgjafar- og upplýsingamiðstöð fyrir fjölskyldur barna með sérþarfir. Félögin eru nú öll undir sama þaki á Háaleitisbraut 13.

Umhyggja er aðili að NOBAB, Nordisk forening for syke barns behov, og einnig að EACH, sem eru evrópsk samtök um réttindi barna inni á sjúkrahúsum.

Forseti Íslands er verndari Umhyggju.

Vefur Umhyggju, félags til stuðnings langveikum börnum.