Embættistaka Höllu Tómasdóttur, sem kjörin var forseti Íslands þann 1. júní 2024, fer fram í Dómkirkjunni og Alþingishúsinu í dag, fimmtudaginn 1. ágúst, og hefst dagskrá klukkan 15:30. Ríkisútvarpið verður með beina sjónvarpsútsendingu frá athöfninni í kirkju og þinghúsi.

Almenningur er boðinn velkominn á Austurvöll til að fylgjast með athöfninni og fagna nýjum forseta. Þar verða settir upp skjáir svo þau sem þar eru stödd geti fylgst með því sem fram fer. Að loknu drengskaparheiti minnist forseti Íslands fósturjarðarinnar af svölum þinghússins.

Þá verður Smiðjan, nýtt skrifstofuhúsnæði Alþingis, í fyrsta sinn nýtt að lokinni embættistöku forseta Íslands fyrir gesti athafnarinnar. Smiðjan var tekin í notkun um síðustu áramót en við fyrri embættistökur hefur móttakan farið fram í Alþingishúsinu.