Forseti fundar með Lisu Murkowski, fulltrúa Alaska í öldungadeild Bandaríkjaþings. Hún er hér á landi til að sækja ráðstefnu Hringborðs norðurslóða sem fer nú fram í Hörpu í Reykjavík. Rætt var um sameiginlega hagsmuni og ábyrgð ríkja á norðurhveli jarðar, meðal annars varðandi lausnir á loftslagsvánni og nýtingu endurnýjanlegrar orku. Öldungadeildarþingmaðurinn greindi frá tækifærum til frekari nýtingar jarðvarma í Alaska. Þá var rætt um komandi kosningar í nóvember, bæði í Bandaríkjunum og á Íslandi, horfur að kosningum loknum og um sameiginlegar áskoranir beggja vegna Atlantshafsins. Loks var rætt um árásarstríð Rússa í Úkraínu, áhrif þess á samstarf í Norðurskautsráðinu og mikilvægi áframhaldandi stuðnings við íbúa Úkraínu.