Síðari dagur ríkisheimsóknar í Danmörku
9. október 2024
Forsetahjón heimsækja Danmörku.
Forsetahjón ásamt konungshjónunum í móttöku við Norðurbryggju í lok tveggja daga ríkisheimsóknar til Danmerkur. Ljósmynd: Ritzau Scanpix
Forsetahjón halda áfram opinberri heimsókn sinni til Danmerkur. Á síðari degi heimsóknarinnar var megináhersla dagskrárinnar á eflingu núverandi viðskiptatengsla Danmerkur og Íslands, aukið samstarf um orkumál og sameiginlega hagsmuni við að mæta loftslags- og sjálfbærnimarkmiðum þjóða.
Um fyrri dag heimsóknarinnar má lesa hér: Konunglegar móttökur
Sjá einnig myndasafn: Ríkisheimsókn til Danmerkur
Viðskiptaþing, háskólanemar og hringborðsumræður
Síðari heimsóknardagurinn hófst með heimsókn til State of Green og Dansk Industri, systurfélaga Grænvangs og Samtaka iðnaðarins á Íslandi. Þar var efnt til Dansk-íslensks viðskiptaþings þar sem fjallað var um tækifæri til frekara samstarfs þjóðanna sem báðar standa framarlega við nýtingu endurnýjanlegrar orku og nýsköpunar á sviði loftslagslausna. Forseti og Danakonungur ávörpuðu bæði þingið og greindi forseti frá því að hún hefði tekið að sér hlutverk verndara Grænvangs.
Næst á dagskrá miðvikudagsins var heimsókn forsetahjóna í danska viðskiptaháskólann, Copenhagen Business School (CBS). Á annað hundrað Íslendinga er við nám í skólanum, auk þess sem þar starfa íslenskir fræðimenn sem forsetahjón hittu að máli. Þá var efnt til viðburðar fyrir nemendur skólans, þar sem dr. Ragnhildur Helgadóttir, rektor Háskólans í Reykjavík, flutti erindi. Að því loknu átti forseti opið samtal við rektor CBS, Peter Møllgard, og svaraði spurningum nemenda úr sal.
Síðdegis var konungi og forseta boðið í sendiherrabústað Íslands í Kaupmannahöfn þar sem þau tóku þátt í hringborðsumræðum um orku-og loftslagsmál með fulltrúum úr íslensku og dönsku viðskiptalífi auk utanríkisráðherra Íslands og borgar- og sveitastjórnarráðherra Danmerkur sem jafnframt er ráðherra norræns samstarfs.
Móttaka til heiðurs konungshjónum
Seint síðdegis buðu forsetahjón til móttöku á Norðurbryggju til heiðurs dönsku konungshjónunum. Í móttökunni reiddi íslenska kokkalandsliðið fram smárétti úr íslensku hráefni auk þess sem boðið var upp á íslenskan bjór frá Ölgerðinni. Sigurður Flosason tónlistarmaður lék tónlist og Ari Eldjárn grínisti skemmti gestum. Með móttökunni lauk formlegri dagskrá ríkisheimsóknarinnar.
Fleiri fréttir
25. febrúar 2026
Nýr vefur opnaður
Hönnun í höndum stafrænu stofunnar Júní
25. febrúar 2026
Nýr vefur opnaður
21. febrúar 2026
„Þýðendur eru brúarsmiðir“
Forseti afhendir Íslensku þýðingarverðlaunin
21. febrúar 2026
„Þýðendur eru brúarsmiðir“
20. febrúar 2026
Sigríður Björk og Jón Karl boðin velkomin
Ráðið í tvö störf hjá embætti forseta
20. febrúar 2026
Sigríður Björk og Jón Karl boðin velkomin