Þrándheimur
10. apríl 2025
Forsetahjón heimsækja Þrándheim.
Forsetahjón heimsækja Þrándheim í fylgd Hákonar, krónprins Noregs. Heimsóknin var liður í dagskrá þriggja daga ríkisheimsóknar forseta til Noregs. Í Þrándheimi var sjónum meðal annars beint að viðskiptum og rannsóknasamstarfi í sjávarútvegi, menningu og varnarmálum.
Forsetahjón og krónprinsinn heimsóttu hina sögufrægu Niðarósdómkirkju í miðborg Þrándheims. Elstu hlutar kirkjunnar eru um 850 ára gamlir og á hún rætur djúpt í sameiginlegri sögu Íslands og Noregs. Herborg Finnset biskup fræddi gestina um sögu kirkjunnar og sýndi þeim aðalaltarið. Þá kom stúlknakór Niðarósdómkirkju fram og söng nokkra sálma, þar á meðal Heyr, himna smiður eftir Kolbein Tumason, sem er elsti varðveitti sálmur Norðurlanda.
Í gestastofu kirkjunnar var saman kominn hópur Íslendinga, sem búsettir eru í Þrándheimi, og gafst forsetahjónum færi á að ræða við þau, ásamt Hákoni krónprinsi. Þá bauð borgarstjóri Þrándheims, Kent Ranum, til hádegisverðar forseta Íslands til heiðurs. Ranum gegndi áður stöðu ræðismanns Íslands í Noregi.
Viðskiptaþing og varnarmál
Í Þrándheimi fór einnig fram viðskiptaþing á vegum norsku vísinda- og tæknistofnunarinnar NTNU og rannsóknarstofnunarinnar SINTEF, í samstarfi við Innovation Norway og Business Iceland. Viðburðinn sóttu fulltrúar úr íslensku- og norsku viðskiptalífi og sjávarútvegi.
Ferðinni til Þrándheims lauk með heimsókn til heimavarnardeildar norska hersins í Værnes þar sem forsetahjónum og krónprinsi var kynnt þjálfunar- og endurhæfingarverkefni sem Norðmenn annast fyrir úkraínska hermenn.
Hákon krónprins kvaddi forsetahjón formlega í Þrándheimi og héldu þau þaðan heim til Íslands að lokinni þriggja daga ríkisheimsókn.
Myndasafn frá ríkisheimsókn til Noregs.
Fleiri fréttir
16. september 2026
Fimm nýir sendiherrar
Forseti tekur við trúnaðarbréfum á Bessastöðum.
16. september 2026
Fimm nýir sendiherrar
14. september 2026
„Getum við lært að vera ósammála fallega?“
Forseti fundar með skólastjórnendum og nemendum framhaldsskóla og háskóla.
14. september 2026
„Getum við lært að vera ósammála fallega?“
11. september 2026
„Ljóð eru eins og andleg eróbikk“
Sýning helguð ljóðabókaskáp Vigdísar í Bókasafni Garðabæjar.
11. september 2026
„Ljóð eru eins og andleg eróbikk“