Forsetahjón heimsóttu Sólheima og fögnuðu 95 ára starfsafmæli þeirra. Sesselja Hreindís Sigmundsdóttir stofnaði Sólheima á 28 ára afmælisdegi sínum þann 5. júlí árið 1930. Hún er af mörgum talin fyrsti íslenski umhverfissinninn og var brautryðjandi í lífrænni ræktun og í að veita þeim skjól sem minnst mega sín. Forseti tók við Sesseljuorðunni, tók fyrstu skóflustungu að stækkun Bláskóga, heldrimannahúss Sólheima, og tók á móti víðförlasta húsi veraldar sem Íslandsstofa gaf. Einnig skoðaði forseti listasýningu Sólheima og fór á leiksýningu um sögu Sesselju sem Edda Björgvinsdóttir stýrði. Að lokum þáðu gestirnir afmæliskaffi í Vigdísarhúsi og tóku við fallegum gjöfum.