Forseti afhenti tvö námsstyrki á Ársfundur Vísinda- og rannsóknarsjóðs Suðurlands sem fram fór á Hótel Selfossi. Þeir komu í hlut Piiu Tomingas og Þorbjörgar Önnu Gísladóttur. Einnig afhenti forseti Menntaverðlaun Suðurlands sem Samtök sunnlenskra sveitarfélaga standa að. Þau hlaut Íslenskuskólinn: Hagnýt orðaforðakennsla í íslensku sem öðru máli við Grunnskólann á Hellu.

Þorbjörg Anna vinnur að meistaraverkefni við Háskóla Íslands þar sem hún leitar meðal annars svara við því hvort Hekla og Vatnafjöll séu eitt eða tvö eldstöðvakerfi. Piia, sem vinnur að doktorsritgerð við Landbúnaðarháskóla Íslands, leitar í sínu verkefni leiða til að standa vörð um líffræðilegan fjölbreytileika vistkerfisins og styðja við alþjóðleg loftslagsmarkmið.

Þróunarverkefnið Íslenskuskólinn miðar að því að þróa, prófa og skjalfesta nýtt kennslulíkan í íslensku fyrir tví- og fjöltyngda nemendur í grunnskóla. Kjarninn í verkefninu er markviss kennsla í orðaforða sem kemur reglulega fyrir í námsbókum og kennslu í öllum námsgreinum en er sjaldan notaður í daglegu tali. Ragnheiður Gísladóttur veitti Menntaverðlaunum Suðurlands móttöku fyrir hönd verkefnisins.

Í ávarpi sem forseti flutti á ársfundinum ræddi hún meðal annars um virka þáttöku íslenskrar kvenna í vísindarannsóknum og nýsköpunarstarfi. Hún sagði meðal annars: „Ég spurði gjarnan í upphafi fyrirlestra og kennslustunda hvað kæmi upp í huga fólks þegar það heyrði orð eins og frumkvöðull. Svarið var oftast á þessa lund: „Skrítinn karl, sem er að bauka úti í bílskúr, að uppgötva eitthvað sem mögulega er lítið gagn af.“ Hugsanlega hefur persóna Georgs gírlausa í Andrésblöðunum haft sín áhrif á þetta viðhorf. Sem betur fer hafa þessar úreltu hugmyndir breyst til batnaðar. Við þurfum nauðsynlega á því að halda að á sem flestum sviðum þjóðlífsins séu vísindarannsóknir nýttar til að auka þekkingarstudda nýsköpun og bregðast við þeim margvíslegu úrlausnarefnum sem blasa við okkur.“