Velsæld
„Hefðbundnar hugmyndir um hagvöxt, þar sem horft er eingöngu á fjárhagslegan ávinning en ekki á velsæld fólks og jarðarinnar, hafa gengið sér til húðar.“
Velsæld er leiðarstef í samtali forseta Íslands við samfélagið. Hugtakið velsæld felur í sér víðtækari skilgreiningu á framförum en þá sem eingöngu byggir á hefðbundnum hagstærðum á borð við landsframleiðslu. Velsæld snýst um heilsu, jöfnuð, menntun, menningu, félagslegt traust og sjálfbæra nýtingu auðlinda - um lífsgæði fólks í nútíð og framtíð.
Í umræðu um framtíð hagkerfa og samfélaga hefur sífellt meiri áhersla verið lögð á að skilgreina árangur með hliðsjón af velsæld almennings og umhverfis. Forseti Íslands hefur í samtölum sínum hvatt til þess að horft sé til langtímahagsmuna, að stefnumótun taki mið af heildrænum áhrifum á samfélag og náttúru og að hagkerfið þjóni fólki - ekki öfugt.
Forseti Íslands er verndari Velsældarþingsins (Wellbeing Economy Forum), alþjóðlegs vettvangs fyrir samtal og samstarf stjórnmálafólks, stefnumótenda, fræðafólks, atvinnulífs og sérfræðinga um framtíð velsældarhagkerfa. Velsældarþingið er skipulagt af Embætti landlæknis og er hluti af alþjóðlegu samstarfsverkefni á sviði lýðheilsu. Næsta Velsældarþing verður haldið í Hörpu í apríl 2026. Þar verður sjónum beint að því hvernig megi endurskilgreina hugmyndir um árangur og framfarir og móta efnahagskerfi sem styðja heilsu, jöfnuð og sjálfbærni. Með þátttöku sinni vill forseti stuðla að opnu og upplýstu samtali um hvernig samfélög geta lagt grunn að velsæld núlifandi og komandi kynslóða.
