Framúrskarandi skólastarf
5. nóvember 2025
Íslensku menntaverðlaunin afhent á Bessastöðum.
Íslensku menntaverðlaunin 2025 voru afhent á Bessastöðum. Líkt og undanfarin ár var dagskráin tekin upp og sýnt frá henni á RÚV. Verðlaunin eru veitt í fimm flokkum og er öllum frjálst að tilnefna til þeirra ár hvert.
Forseti flutti ávarp í upphafi athafnarinnar og lagði þar áherslu á að menntun væri eitt mikilvægasta og vandasamasta verkefni hvers samfélags. Hún bætti síðan við: „Það leikur enginn vafi á því að við sem samfélag eigum ávallt að leita allra leiða til að styrkja og bæta menntakerfið. Það gerum við hér í dag með því að lyfta því upp sem vel er gert og beina sviðsljósinu að styrkleikum í skólastarfi. Við vonum að með því móti getum við hvatt til dáða alla þá sem vinna á þessum stóra og fjölbreytta vettvangi.“
Skólahljómsveit Vesturbæjar og Miðbæjar hlaut Íslensku menntaverðlaunin að þessu sinni fyrir framúrskarandi menntastarf. Örvar Rafn Hlíðdal, íþróttakennari við Flóaskóla, fékk verðlaunin fyrir framúrskarandi kennslu. Lítil skref á leið til læsis, samstarfsverkefni leikskólans Grænuvalla og Borgarhólsskóla á Húsavík um málörvun og læsi, var valið framúrskarandi þróunarverkefni. Verðlaun fyrir framúrskarandi framlag til iðn- eða verkmenntunar komu í hlut Framhaldsskólans í Vestmannaeyjum en hann hefur markað sér sterka stöðu í kennslu málm- og vélstjórnargreina. Hvatningarverðlaun fékk starfsfólk Háaleitisskóla í Reykjanesbæ en þar hefur tekist að skapa einstaklega jákvæða skólamenningu, m.a. með því að líta á fjölmenningu sem styrk skólans.
Að Íslensku menntaverðlaununum standa, ásamt embætti forseta Íslands, Félag um menntarannsóknir, Grunnur – félag fræðslustjóra og stjórnenda skólaskrifstofa, innviðaráðuneytið, Kennaradeild Háskólans á Akureyri, Kennarasamband Íslands, Listaháskóli Íslands, mennta- og barnamálaráðuneytið, Menntavísindasvið Háskóla Íslands, Miðstöð menntunar og skólaþjónustu, Miðstöð skólaþróunar við Háskólann á Akureyri, Samband íslenskra sveitarfélaga, Samtök áhugafólks um skólaþróun, Skóla- og frístundasvið Reykjavíkurborgar og Samtök iðnaðarins.
Nánari upplýsingar um verðlaunahafa og tilnefnd verkefni árið 2025 eru aðgengilegar á vef Samtaka áhugafólks um skólaþróun. Útsending frá athöfninni er aðgengileg á vef RÚV.
Fleiri fréttir
25. febrúar 2026
Nýr vefur opnaður
Hönnun í höndum stafrænu stofunnar Júní
25. febrúar 2026
Nýr vefur opnaður
21. febrúar 2026
„Þýðendur eru brúarsmiðir“
Forseti afhendir Íslensku þýðingarverðlaunin
21. febrúar 2026
„Þýðendur eru brúarsmiðir“
20. febrúar 2026
Sigríður Björk og Jón Karl boðin velkomin
Ráðið í tvö störf hjá embætti forseta
20. febrúar 2026
Sigríður Björk og Jón Karl boðin velkomin