„Ímyndunarafl er dásamlegt orð“
12. október 2026
Ljósmyndir: Pétur Fjeldsted.
Samtal kvenleiðtoga á Imagine Forum.
Samtal kvenleiðtoganna þriggja við Christiane Amanpour var hluti af friðarráðstefnunni Imagine Forum sem var nú haldin í tíunda skipti.
Upptaka frá allri dagskrá Imagine Forum er aðgengileg á vef ráðstefnunnar. Samtal kvenleiðtoganna þriggja við Christiane Amanpour hefst á 03:30:30.
Horfa á upptöku.
Forseti Íslands, Halla Tómasdóttir, forseti Slóveníu, Nataša Pirc Musar og fyrrverandi forseti Írlands, Mary Robinson, tóku þátt í samtali um forystuhlutverk og frið á tímum sundrungar og óvissu. Christiane Amanpour, fréttastjóri hjá CNN, stjórnaði umræðunum sem voru hluti af ráðstefnunni Imagine Forum.
Umræðan hófst á upprifjun á leiðtogafundinum í Reykjavík 1986 og þeim lærdómi sem í honum fælist. Halla Tómasdóttir minnti á að strax eftir fundinn hefði mörgum fundist að hann hefði mistekist en þegar frá leið kom á daginn að samtalið sem þar átti sér stað milli leiðtoga Bandaríkjanna og Sovétríkjanna hefði verið upphafið að mikilvægum samningum um afvopnun. Hún sagðist líta svo á að Ísland væri einn af þeim stöðum þar sem hið ómögulega gæti orðið að veruleika.
Mary Robinson benti á að oft gætu smávægileg atriði skipt sköpum í stærra samhengi. Hún sagði að þegar hún var forseti Írlands hefði hún alltaf haft kveikt á kerti úti í glugga á heimili sínu. Skilaboðin hafi verið þau að brottfluttir Írar væru velkomnir aftur heim. Hún sagði að áhrifin af þessu táknræna ljósi hefðu verið miklu magnaðri en hún átti von á. Robinson ræddi einnig að virðingarleysi gagnvart alþjóðalögum og alþjóðasamningum væri að aukast. Hún sagði mikilvægt að leiðtogar stæðu vörð um hvort tveggja og létu til sín heyra þegar lýðræði og frelsi væri ógnað.
Nataša Pirc Musar ræddi meðal annars um árásarstríð Rússa í Úkraínu og setti það í samband við ófriðinn á Balkanskaga á síðasta áratug liðinnar aldar. Hún sagði að mannkyninu gengi illa að draga lærdóma af sögunni og að því miður væri erfitt og tímafrekt að ná raunverulegum sáttum milli stríðandi fylkinga og vinna bug á langrækni. Mikilvægt væri að skilja að við gætum ekki breytt fortíðinni og að við þyrftum að horfa lausnamiðuðum augum til framtíðar. Oft þyrfti að gera margítrekaðar tilraunir til að ná árangri við samningaborðið.
Meðal annara umræðuefna leiðtoganna var þróun samfélagsmiðla og gervigreindar og nauðsyn þess að þjóðir heims sameinuðust um alþjóðleg viðmið til að vernda almenning, ekki síst börn, fyrir áhrifum þeirra. Þær sögðu frá ákalli um ábyrga foryrstu sem þær og fleiri þátttakendur í leiðtogahring í Höfða hefðu mótað í samtali síðdegis á sunnudag, 11. október.
Í lok samtalsins ræddu leiðtogarnir um mikilvægi þess að kalla yngri kynslóðir að borðinu við mótun framtíðarinnar. „Ímyndunarafl er dásamlegt orð,“ sagði Robinson og lagði áherslu á að þau sem væru eldri þyrftu að virkja ímyndunarafl unga fólksins til að mæta þeim áskorunum sem við heiminum blasa. Halla og Musar tóku undir þau orð og vísuðu hvor með sínum hætti til texta lagsins „Imagine“ eftir John Lennon. Halla lagði áherslu á að þótt blikur væru víða á lofti væri svigrúm til að láta sig dreyma um betri tíma. Musar sagðist gjarnan vilja smitast af bjartsýni starfssystur sinnar og endaði mál sitt á orðum Lennons: „Mér er sagt að ég sé draumóramanneskja en ég er ekki ein um það.“
Eftir samtal sitt við Christiane Amanpour skrifuðu kvenleiðtogarnir þrír formlega undir áðurnefnt ákall sem ber á ensku yfirskriftina: „Call from Reykjavík“. Áformað er að að bjóða fleirum að taka undir það á næstu dögum og vikum.
Nánar er fjallað um samtal leiðtogahringsins í Höfða og „Ákall frá Reykjavík“ („A Call from Reykjavík“) í annari frétt hér á vefnum.
Sjá nánar.
Fleiri fréttir
12. október 2026
Ákall um ábyrga forystu
Hópur leiðtoga tekur þátt í samtali í Höfða.
12. október 2026
Ákall um ábyrga forystu
11. október 2026
„Gerum heiminn að griðastað“
Forseti tekur þátt í lokaviðburði Samtals í Hörpu.
11. október 2026
„Gerum heiminn að griðastað“
10. október 2026
Samtal fer fram um land allt
Forseti ávarpar þátttakendur um land allt.
10. október 2026
Samtal fer fram um land allt