Samtal þjóðar
Laugardaginn 10. október 2026 var efnt til Samtals um land allt. Ólíkar kynslóðir voru þá hvattar til að setjast niður og ræða í einlægni spurninguna: Hvernig samfélag viljum við skapa saman? Gervigreind, samfélagsmiðlar og framtíð menntunar voru þátttakendum ofarlega í huga.
Árið 2026 tók stór hópur fólks, samtaka og stofnana höndum saman við mótun verkefnisins Samtals. Hugmyndin varð til við borðstofuborðið á Bessastöðum á vordögum en á haustdögum var verkefninu hrint í framkvæmd. Hundruðir einstaklinga settust niður til Samtals laugardaginn 10. október, meðal annars i framhaldsskólum um land allt. Ungt fólk leiddi umræðurnar á hverjum stað.
Sunnudaginn 11. október var efnt til viðburðar í Hörpu þar sem afrakstur Samtalsins var kynntur. Þar kom fram að gervigreind, samfélagsmiðlar og menntun hefðu verið þátttakendum ofarlega í huga en að einnig hefðu margir rætt um hve dýrmætt það væri að setjast niður með öðrum til að skiptast á skoðunum.
Forseti flutti ávarp á viðburðinum og sagði meðal annars: „Í aðdraganda Samtalsins sem fram fór í gær hef ég oft sagt að vonin vaxi með virkri þátttöku. Í dag vil ég bæta við að vonin vex líka þegar við veljum samtal í stað sundrungar, þegar við leggjum sameiginlega rækt við kærleika og frið.“
Vonir standa til að hægt verði að endurtaka Samtalið á næstu misserum. Forseti Íslands er verndari verkefnisins en meðal þeirra mörgu sem lögðu hönd á plóginn við undirbúning þess árið 2026 voru Samtal - félag til almannaheilla, Bandalag íslenskra skáta, UMFÍ, Félag framhaldsskólanema, Skólameistarafélag Íslands, Landssamband íslenskra stúdenta, Riddarar kærleikans, Heimili og skóli, ráðuneyti og stofnanir.
