„Líðan barna er mælikvarði á heilbrigði samfélagsins“
27. maí 2026
Ljósmyndir: Laufey Björk Ólafsdóttir
Forseti í samtali við framkvæmdastjóra UNICEF.
Forseti og Catherine Russell, framkvæmdastjóri UNICEF, voru að hittast í fyrsta sinn á ársfundinum í NASA.
Hægt er að sjá upptöku með samtali forseta Íslands og framkvæmdastjóra Barnahjálpar Sameinuðu þjóðanna á vef UNICEF.
Sjá nánar.
Forseti Íslands, Halla Tómasdóttir, og Catherine Russell, framkvæmdastjóri Barnahjálpar Sameinuðu þjóðanna (UNICEF) áttu áhrifamikið samtal á alþjóðlegum ársfundi leiðtoga landsnefnda UNICEF sem fram fór í Sjálfstæðissalnum við Austurvöll. Þær ræddu stöðu barna og ungmenna, alþjóðastjórnmál og áskoranir sem mannúðarsamtök standa frammi fyrir.
Í upphafi samtalsins nefndi forseti þrjú atriði sem væru áhyggjuefni. Í fyrsta lagi væru börn að deyja af völdum stríðsátaka á fleiri stöðum en áður. „Og þjóðarleiðtogar ræða fremur um stríð og vopn en að vinna að því að vernda og bjarga börnum. Þetta er þróun sem hræðir mig,“ sagði forseti. Í öðru lagi væri óhugnanlegt að sjá að eftir að náðst hefði umtalsverður árangur í baráttu gegn hungri í heiminum væri ástandið nú víða við hættumörk. Loks ræddi hún um hina hljóðlátu árás á velferð barna sem fælist í áhrifavaldi samfélagsmiðla og óhóflegri notkun skjátækja. „Líðan barna er mælikvarði á heilbrigði samfélagsins,“ sagði hún í því sambandi.
Catherine Russell tók undir áhyggjur forseta og sagði það gera illt verra að alþjóðasamskipti væru öll úr lagi gengin. Hún lýsti yfir sérstökum áhyggjum af skertum framlögum til þróunaraðstoðar. Um árabil hefðu Bandaríkin verið þungamiðjan í alþjóðlegu kerfi þar sem aðstoð við fólk sem stæði höllum fæti var forgangsatriði. Nánast á einni nóttu hefði þetta gjörbreyst. Russell minnti einnig á að tilfinnanlegur skortur á aðgerðum í umhvefismálum bitnaði sérstaklega illa á börnum. UNICEF hefði lagt mikla áherslu á að efla sjálfbærni og þolgæði samfélaga gagnvart afleiðingum loftslagsbreytinga. Russell ræddi einnig um verkefni sem miðuðu að því að auka jafnrétti og vernda stúlkur. Hún tók dæmi af hræðilegu skipulögðu ofbeldi sem beinist gegn stúlkuhópum í Dafur-héraði í Súdan á liðnu hausti. „Hvers konar hatur drífur svona nokkuð áfram og hvaðan kemur þetta hatur?“ spurði hún.
Í lok samræðunnar var opnað fyrir spurningar úr sal. Russell lagði í lokin áherslu á að þrátt fyrir þær ógnir sem steðji nú að sé alþjóðasamstarf enn fyrir hendi og að vonin um betri heim væri stöðugt leiðarljós alls mannúðarstarfs hjá UNICEF. Forseti lauk máli sínu með því að minna á að á viðsjárverðum tímum þyrfum við öll að líta í eigin barm og gera upp við okkur hvers konar manneskjur við vildum vera.
Fleiri fréttir
26. maí 2026
Rætt um jafnréttismál og græna orku
Forseti hittir bandarískar öldungadeildarþingkonur.
26. maí 2026
Rætt um jafnréttismál og græna orku
26. maí 2026
„Leikhúsið er griðastaður“
Forseti afhendir heiðursverðlaun Grímunnar.
26. maí 2026
„Leikhúsið er griðastaður“
22. maí 2026
„Við getum byggt brýr milli ólíkra sjónarmiða“
Forseti boðar til samtals um framtíðina.
22. maí 2026
„Við getum byggt brýr milli ólíkra sjónarmiða“