„Fátt er hollara en að finna tilgang og tilheyra góðri liðsheild“
19. október 2026
Ljósmyndir: Sigurður Ólafur Sigurðsson, EFÍ.
Stiklur úr dagbók forseta.
Forseti í samtali við Kristin Þórisson á norrænu gervigreindarráðstefnunni á Hótel Öskju.
Áhugavert viðtal við Ferenc Utassy birtist nýlega á vefmiðlinum European Diplomacy and Economics. Þar lýsir hann ástarsambandi sínu og Íslands undanfarin 27 ár.
Sjá nánar.
Forseti tók þátt í tveimur ráðstefnum í liðinni viku. Hún átti annars vegar samtal við Kristin Þórisson á norrænni ráðstefnu um gervigreind. Hins vegar flutti hún opnunarávarp á alþjóðlegri ráðstefnu á vegum Landsbjargar. Einnig tók forseti á móti ýmsum góðum gestum á Bessastöðum, þeirra á meðal Ferenc Utassy sem hún sæmdi riddarakrossi fálkaorðunnar.
Ráðstefnan NAIM (Nordic AI Meet) er sérstaklega ætluð doktorsnemum og nýdoktorum sem stunda rannsóknir á sviði gervigreindar á Norðurlöndum. Hún var að þessu sinni skipulögð af Gervigreindarsetri Háskólans í Reykjavík (CADIA) og haldin á Hótel Öskju (áður Hótel Loftleiðir). Fimmtudaginn 15. október tók forseti þátt í dagskrá ráðstefnunnar með samtali við Kristin Þórisson, prófessor í tölvunarfræði við HR og einn af stofnendum CADIA. Þau ræddu meðal annars um „Ákall frá Reykjavík“ sem forseti og fleiri leiðtogar mótuðu á fundi í Höfða 11. október en einnig þau tækifæri sem Norðurlöndin og Eystrasaltsríkin hefðu í samstarfi um þróun gervigreindar til góðs.
Annað hvert ár skipuleggur Slysavarnarfélagið Landsbjörg fjölmenna alþjóðlega ráðstefnu fyrir félagsfólk sitt. Ráðstefnan Björgun 2026 var sett föstudaginn 16. október í Hörpu. Forseti, sem er verndari Landsbjargar, flutti opnunarávarp. Hún ræddi þar um það stóra og mikilvæga öryggishlutverk sem framvarða- og bakvarðasveitir Landsbjargar leika hér á landi en einnig um hvaða gildi það hefur að starfa innan vébanda félagsins. Hún sagði meðal annars:
„Við Íslendingar búum í landi einstakrar náttúrufegurðar. En eins og við vitum öll getur náttúran okkar verið bæði stórbrotin og stórhættuleg. Hér koma lægðirnar gjarnan í röðum, fjallshlíðar geta farið fyrirvaralaus af stað, jörðin opnast og hraun runnið. Og stundum virðist veðrið beinlínis hafa ákveðið að minna okkur á hver ræður. En þegar eitthvað bjátar á vitum við að hópur fólks er tilbúinn að leggja allt annað til hliðar, klæða sig í gallann og halda af stað. Oftar en ekki út í myrkur, kulda og óvissu, ekki aðeins vegna þess að nauðsyn krefur, heldur einnig og ekki síður vegna þess að það vill gera gagn.“
Síðar í ávarpi sínu sagði forseti: „Mér þykir sérstaklega vænt um að heyra að unga kynslóðin sæki í auknum mæli í að starfa innan björgunarsveitanna. Ég held að fátt sé hollara og eins gefandi fyrir ungt fólk en að sinna samfélagslegum verkefnum. Þar lærist svo margt sem ekki verður kennt af bókum: Að starfa saman. Að treysta öðrum. Að bera ábyrgð. Að sýna hugrekki, útsjónarsemi og æðruleysi þegar mest á reynir. Og ekki síst að finna tilgang og tilheyra góðri liðsheild.“ Forseti lauk máli sínu á að þakka þeim mörgu sem koma að starfi Landsbjargar og styðja félagið fjárhagslega fyrir ómetanlegt framlag til samfélagsins.
Meðal gesta sem forseti tók á móti á Bessastöðum í liðinni viku var hinn kunni útvarpsmaður og tónlistarmaður Þorgeir Ástvaldsson og kórinn Bjartsýni sem er að mestu skipaður félögum úr Blindrafélaginu. Að auki sæmdi forseti Ferenc Utassy riddarakrossi fálkaorðunnar fyrir þjónustu við hagsmuni Íslendinga og framlag til að styrkja og efla tengsl Íslands og Ungverjalands. Utassy hefur verið kjörræðismaður Íslands í Ungverjalandi undanfarin fjórtán ár en undir lok síðustu aldar bjó hann í tæpan áratug á Austfjörðum og sinnti þar tónlistarkennslu og kórstjórn, auk þess að vera mikils metinn organisti.
Fleiri fréttir
16. október 2026
Mannleg dómgreind á tímum gervigreindar
Forseti birtir grein í tímaritinu TIME.
16. október 2026
Mannleg dómgreind á tímum gervigreindar
12. október 2026
„Ímyndunarafl er dásamlegt orð“
Samtal kvenleiðtoga á Imagine Forum.
12. október 2026
„Ímyndunarafl er dásamlegt orð“
12. október 2026
Ákall um ábyrga forystu
Hópur leiðtoga tekur þátt í samtali í Höfða.
12. október 2026
Ákall um ábyrga forystu