Fjárfest í menntun, menningu og fólki
22. ágúst 2026
Ljósmyndir: Embætti forseta Eistlands.
Forsetahjón og opinber sendinefnd kynna sér eistneska nýsköpun.
Forsetahjón og íslenska sendinefndin ásamt Martin Hanson og Carl-Robert Reidolf í salarkynnum CR14.
„Áfram stelpur í tæknigreinum“ er eitt af kjörorðum HK Unicorn Squad. Hægt er að fræðast um verkefnið á heimasíðu þess.
Sjá nánar.
Hluti af dagskrá forsetahjóna í ríkisheimsókn þeirra til Eistlands 19.-21. águst voru kynningar á stofnunum og setrum þar sem lögð er áhersla á tækniþróun og frumkvöðlastarf. Meðal viðkomustaða þeirra og eistnesku forsetahjónanna, hr. Alar og Sirje Karis, var rúmgóður bílskúr í úthverfi Tallinn þar sem verkfræðingurinn Taavi Kotka hefur sett á fót nýsköpunarsetur til að kynda undir áhuga stúlkna á tæknigreinum.
Eitt af markmiðum heimsóknarinnar til Eistlands var að efla samstarf landanna tveggja á sviði tækni og menntamála. Í fylgdarliði forseta var Logi Már Einarsson, menningar-, nýsköpunar- og háskólaráðherra, ásamt opinberri sendinefnd en hana skipuðu meðal annars Nína Björk Jónsdóttir sendiherra, ráðuneytisstjórarnir Ásdís Halla Bragadóttir og Sigrún Brynja Einarsdóttir og Lilja Dögg Jónsdóttir, framkvæmdastjóri Almannaróms sem er miðstöð máltækni og gervigreindar.
Á fyrsta degi heimsóknarinnar, 19. ágúst, heimsótti hópurinn CR14, stofnun sem eistneska varnarmálaráðuneytið starfrækir í samstarfi við Atlantshafsbandalagið. Meðal verkefna CR14 er skipulagning viðbragða við netárásum og þjálfun sérfræðinga á því sviði. Martein Hanson og Carl-Robert Reidolf kynntu starfsemina og svöruðu spurningum.
Á öðrum degi heimsóknarinnar, 20. ágúst, tók verkfræðingurinn Taavi Kotka á móti íslensku og eistnesku forsetahjónunum í bílskúr reisulegs einbýlishúss sem eitt sinn var heimili Kotka-fjölskyldunnar en er nú miðstöð nýsköpunarhópsins HK Unicorn Squad (HK Einhyrningarsveitin) og drónaþjálfunarnámskeiðsins Kuri Kotkas (Reiði örninn).
Kveikja Einhyrningarsveitarinnar var sú að Helen Kotka, dóttir verkfræðingsins, fékk ekki aðgang að valnámskeiði í forritun í barnaskólanum sínum. Taavi ákvað því að skipuleggja nýsköpunarnámskeið fyrir hana og nokkrar skólasystur hennar á mánudagskvöldum í bílskúrnum. Átta árum síðar hefur verkefnið breiðst út um allt Eistland og útskrifað um 8000 stúlkur. Árlega hittist hluti hópsins í Sumarbúðum Einhyrningssveitarinnar en starfsemin er enn að mestu byggð á sjálfboðaliðastarfi og styrkjum einkafyrirtækja.
Á efri hæð þessa sama húss og opnu svæði í nágrenni þess er starfsvettvangur Kuri Kotkas-námskeiðsins. Þar gefst einstaklingum kostur á að þjálfa sig í drónaflugi og er markmiðið að skapa varalið almennra borgara sem geti tekið þátt í vopnuðum átökum. Bakhjarlar þessa verkefnis, sem Taavi Kotka átti frumkvæði að, eru varnarmálaráðuneyti Eistlands og eistneski herinn.
Á þriðja degi heimsóknarinnar, 21. ágúst, fóru forsetahjónin og íslenska sendinefndin í Pelgulinna-skólann í Tallinn. Um er að ræða eina af um 20 nýjum menntaskólabyggingum sem eistnesk menntayfirvöld ákváðu að byggja fyrir fáeinum árum, í og með til að ýta undir nýsköpun. Skólastjórinn, Indrek Lillemagi, leiddi forsetahjónin og sendinefndina um bygginguna og sagði frá þeim áherslum sem hann og samstarfsfólk hans hafa mótað í nánu samstarfi við nemendur og foreldra.
Í lok þessarar heimsóknar hlýddi hópurinn síðan á kynningu á nýju verkefni sem menntamálayfirvöld í Eistlandi kalla TI Hüpe (Gervigreindar-stökkið) en það miðar að því að efla notkun gervigreindar í skólastarfi. Í upphafi var áhersla lögð á endurmenntun menntaskólakennara og samstarf við alþjóðleg fyrirtæki á sviði gervigreindar en á næstu misserum mun vaxandi athygli beinast að grunnskólastiginu. Tveir af stjórnendum TI Hüpe, þeir Linnar Viik og Ivo Viska, sögðu frá verkefninu og svöruðu spurningum. Í máli þeirra, eins og annarra sem hittu íslensku sendinefndina, kom fram einlægur vilji til samstarfs við íslensk yfirvöld og stofnanir.
Síðasti viðkomustaður forsetahjóna í ríkisheimsókninni til Eistlands var Íslandstorg í Tallinn en þar flutti forseti, Halla Tómasdóttir, stutt ávarp. Hún ræddi þar meðal annars um þessar heimsóknir og hrósaði eistneskum yfirvöldum fyrir að hafa framsýni til að fjárfesta í menntun, menningu og fólki.
Fleiri fréttir
21. ágúst 2026
Kveðjustund á Íslandstorgi
Lokadagur ríkisheimsóknar til Eistlands.
21. ágúst 2026
Kveðjustund á Íslandstorgi
20. ágúst 2026
Hátíðisdagur í Tallinn
Annar dagur ríkisheimsóknar til Eistlands.
20. ágúst 2026
Hátíðisdagur í Tallinn
19. ágúst 2026
„Við megum ekki glata tengslunum við grunntón mennskunnar“
Forsetahjón sitja hátíðarkvöldverð í boði gestgjafa sinna.
19. ágúst 2026
„Við megum ekki glata tengslunum við grunntón mennskunnar“