„Þannig styrkjum við okkar heimahöfn“
17. júní 2026
Ljósmynd: RÚV.
Forseti flytur hátíðarræðu á Austurvelli.
„Látum daginn í dag minna okkur á það sem sameinar okkur," sagði forseti meðal annars á Austurvelli. Hátíðarræða hennar er aðgengileg hér á vefnum.
Sjá nánar.
Forseti Íslands, Halla Tómasdóttir, flutti hátíðarræðu á Austurvelli á árvissri athöfn í tilefni þjóðhátíðardagsins. Í máli forseta kom fram að stefnt sé að því að fólk komi saman um allt land í október, í tengslum við 40 ára afmæli leiðtogafundarins í Höfða, og eigi samtal um frið, farsæld og framtíð Íslands.
Athöfnin á Austurvelli hófst á því að Kristrún Frostadóttir forsætisráðherra lagði blómsveig frá íslensku þjóðinni að minnisvarða Jóns Sigurðssonar. Því næst tók forseti til máls og sagði meðal annars:
„Á undan nýársávarpi mínu í janúar fluttu Fjallabræður lagið Heimahöfn. Höfundarnir, Hákon Guðni, sjómaður að norðan, og Halldór Gunnar, Fjallabróðir og kórstjóri, sögðu þá að það fjallaði um „þá mannlegu þörf að finna hvar maður á heima og hvað það er sem kveikir þá tilfinningu“. Þessi orð og texti lagsins hreyfðu við mér, fengu mig til að velta fyrir mér á hvern hátt landið okkar góða, Ísland, er heimahöfn í fleiri en einum skilningi.
Heimahöfn er staður þar sem við njótum öryggis, þar sem okkur líður vel og við finnum til samkenndar. Hún er staðurinn sem við leggjum upp frá til að kanna ókunna stigu. Hún er staðurinn sem tekur á móti okkur með opnum örmum, hvernig sem við erum. Kannski er eitt mikilvægasta verkefni hverrar manneskju - og hverrar þjóðar - að styrkja sína heimahöfn.“
Síðar í hátíðarræðunni sagði forseti ennfremur:
„Leiðtogafundurinn árið 1986 er heiminum öllum áminning um áhrifamátt samtalsins. Hann vekur vonir um að jafnvel á tímum djúpstæðs ágreinings sé hægt að brúa bil, sætta ólík sjónarmið og leita sameiginlegra lausna. Hann minnir okkur einnig á að friður er aldrei sjálfgefinn. Friður er afrakstur vilja, hugrekkis og trúar á gildi þess að halda samtalinu lifandi. Þessi lærdómur má ekki gleymast. Ég held raunar að hann eigi sérstaklega brýnt erindi við okkur Íslendinga hér og nú.
Á þessum tímamótum er viðeigandi að þjóðin staldri við og spyrji: Hvernig styrkjum við okkar heimahöfn? Hvernig hlúum við að velferð fólksins okkar og tryggjum að náttúran, sem hefur fóstrað okkur, styðji áfram við komandi kynslóðir? Hvernig sköpum við börnum og ungu fólki tækifæri til að dafna og trúa á framtíðina? Hvernig tryggjum við að tækniframfarir og gervigreindin verði til góðs fyrir manneskjuna, lýðræðið og samfélagið sem við erum öll hluti af? Þetta eru ekki spurningar sem þröngur hópur, einn stjórnmálaflokkur eða ein kynslóð getur svarað. Þetta eru spurningar sem kalla á víðtækt samtal þjóðarinnar.
Víða er fólk að velta fyrir sér hvernig við getum skapað rými þar sem allar kynslóðir og ólík sjónarmið mætast af virðingu og forvitni. Nú vinnur fjölbreyttur hópur einstaklinga að því að fólk komi saman um allt land í október og eigi samtal um framtíð Íslands og okkar sameiginlegu heimahöfn – samtal um frið, farsæld og framtíð. Lögð verður rík áhersla á að ungt fólk verði þar í veigamiklu hlutverki.“
Athöfninni á Austurvelli lauk á ávarpi fjallkonunnar sem Elín Hall leikkona flutti en ávarpið samdi Bragi Valdimar Skúlason.
Fleiri fréttir
17. júní 2026
Fjórtán Íslendingar heiðraðir á Bessastöðum
Forseti sæmir 14 einstaklinga heiðursmerki fálkaorðunnar.
17. júní 2026
Fjórtán Íslendingar heiðraðir á Bessastöðum
13. júní 2026
„Lifandi ímynd æskufjörs og gleði“
Forsetahjón taka þátt í 1150 ára afmælishátíð Hrunamannahrepps.
13. júní 2026
„Lifandi ímynd æskufjörs og gleði“
2. júní 2026
Sóknarfæri í nýtingu jarðhita
Forseti fundar með utanríkisráðherra Slóvakíu.
2. júní 2026
Sóknarfæri í nýtingu jarðhita