„Það er vart hægt að hugsa sér mikilvægara hlutverk“
26. september 2026
Ljósmyndir: Árni Sæberg.
Forseti flytur ávarp á afmælishátíð Landhelgisgæslunnar.
Forseti ásamt Georg Kr. Lárussyni, forstjóra Landhelgisgæslunnar.
Ávarp forseta í tilefni af 100 ára afmæli Landhelgisgæslunnar er aðgengilegt hér á vefnum.
Sjá nánar.
Forseti Íslands, Halla Tómasdóttir, flutti ávarp á afmælishátíð Landhelgisgæslu Íslands sem fagnar um þessar mundir 100 ára afmæli. Meðal annarra sem tóku til máls á hátíðinni, sem fram fór í Hörpu, voru Þorbjörg Sigríður Gunnlaugsdóttir dómsmálaráðherra, Georg Kr. Lárusson forstjóri Landhelgisgæslunnar og Guðni Th. Jóhannesson, fv. forseti Íslands.
Í ávarpi sínu rifjaði forseti upp að saga gæslunnar hófst í raun árið 1918 þegar Björgunarfélag Vestmannaeyja safnaði fyrir fyrsta björgunar- og varðskipi landsins, Þór. Skipið sinnti strandgæslu og fleiri verkefnum á miðunum í kringum Vestmannaeyjar á þriðja áratugnum en árið 1926 tók ríkið við rekstri Þórs sem varð, ásamt Óðni, floti hinnar nýju Landhelgisgæslu.
„Mér finnst þessi saga segja margt um okkur Íslendinga og þá kynslóð sem varðaði leið þjóðarinnar frá fátækt til velsældar,“ sagði forseti í ávarpi sínu. „Fyrir 100 árum var grundvöllur margra þjóðþrifaverkefna hérlendis, eins og reyndar enn í dag, lagður af einstaklingum sem tóku höndum saman og lyftu grettistaki. Kannski er það einmitt í samtakamættinum sem öryggi skapast – ekki með stáli eða tækni heldur með ákvörðun um að við ætlum að fylgjast að og standa vörð hvert um annað.“
Í niðurlagi ávarpsins sagði forseti ennfremur:
„Undanfarin misseri hef ég oft talað um mikilvægi heimahafnar. Ég hef lagt áherslu á að við þurfum öll stað þar sem við finnum til öryggis, trausts og tengingar. Fyrir eyþjóð eins og Ísland er heimahöfn ekki aðeins falleg myndlíking. Hún er raunveruleiki. En örugg heimahöfn verður ekki til af sjálfu sér. Hún verður til vegna þess að einhver stendur vörð um hana. Vegna þess að einhverjir leggja af stað þegar aðrir þurfa á hjálp að halda. Vegna þess að margir eru tilbúnir til að leggja sitt af mörkum til að aðrir komist heilir heim. Í hundrað ár hefur Landhelgisgæsla Íslands hjálpað þjóðinni að varðveita heimahöfn sína. Fyrir það vil ég þakka. Innilega til hamingju með aldarafmælið.“
Fleiri fréttir
28. september 2026
„Hvernig samfélag viljum við skapa saman?“
Forseti hvetur almenning til þátttöku í Samtali 10. október.
28. september 2026
„Hvernig samfélag viljum við skapa saman?“
21. september 2026
Tæknin í okkar þágu - ekki öfugt
Forseti birtir grein um tækniþróun og framtíðina.
21. september 2026
Tæknin í okkar þágu - ekki öfugt
16. september 2026
Fimm nýir sendiherrar
Forseti tekur við trúnaðarbréfum á Bessastöðum.
16. september 2026
Fimm nýir sendiherrar