Velsæld á tímum gervigreindar
16. apríl 2026
Ljósmyndir: Pétur Fjeldsted.
Forseti og Jesper Brodin ræða gervigreind á Velsældarþingi.
Forseti Íslands, Halla Tómasdóttir, ræddi leiðtogahæfni og velsæld á tímum gervigreindar við Jesper Brodin, fyrrverandi forstjóra IKEA og stjórnarformann B Team á Velsældarþingi 2026 sem fram fór Hörpu 16.-17. apríl.
Forseti og Jesper ræddu hlutverk leiðtoga á tímum hraðra samfélagsbreytinga, þar sem áskoranir á borð við gervigreind, loftslagsbreytingar, aukinn ójöfnuð og breytt alþjóðlegt samhengi kalla á nýja nálgun í stefnumótun og forystu.
Þau ræddu ógnar hraða þróun gervigreindar og djúpstæð og víðtæk áhrif á hennar á samfélag okkar, þar með talið skapandi greinar, menntun, störf, loftslagsmál og lýðræðislega umræðu.
Jesper lagði áherslu á að leiðtogar fyrirtækja, þ. á m. tæknifyrirtækja, þurfi að tileinka sér ný vinnubrögð og axla ábyrgð á hnattrænum áhrifum starfsemi sinnar. Ikea hefur verið leiðandi á þessu sviði og tekið markviss skref í átt að sjálfbærni til að auka velsæld jarðarinnar og fólksins byggir hana. „Við verðum að endurskilgreina velgengni; hún snýst ekki um að vinna gróðakapphlaupið á kostnað allra annarra. Það þarf enginn að bera skarðan hlut frá borði. Það er löngu sýnt að arðsemi og jákvæð samfélags- og umhverfisáhrif haldast í hendur“, sagði Jesper. „Við þurfum hugrakka leiðtoga sem þora að vera bjartsýn, setja sér djörf markmið og ráðast í markvissar aðgerðir til að breyta heiminum til hins betra“.
Forseti og Jesper ræddu hvernig við fljótum sofandi að feigðarósi gervigreindarinnar en forseti hefur kallað eftir stefnumótun og aðgerðum á þessu sviði. „Þetta er stórt og flókið verkefni sem krefst samtals, samstöðu og skýrrar framtíðarsýnar. Við verðum að tryggja að tæknin þjóni mennskunni – ekki öfugt“.
Ungir leiðtogar víða að úr heiminum tóku þátt í samtalinu þar sem þau deildu sinni sýn, reynslu og áskorunum sem þau standa frammi fyrir þegar kemur að gervigreind, heilsu, lífsgæðum, jöfnuði og sjálfbærni.
Velsældarþingið leiðir saman alþjóðlega leiðtoga, stjórnmálafólk, fræðimenn, fulltrúa atvinnulífsins og stofnanir til að fjalla um brýn viðfangsefni samtímans, þar á meðal aukna byrði langvinnra sjúkdóma, loftslagsbreytingar, félagslegan ójöfnuð og traust til stofnana. Sérstök áhersla var lögð á hagnýtar lausnir og stefnumótun sem styður við velsæld sem mælikvarða á árangur samfélaga.
„Velsældarþinginu er ætlað að víkka skilning okkar á því hvað felst í velgengni, því að „ganga vel“. Þegar við færum fókusinn frá auði, áhrifum og völdum yfir í tengsl, jafnvægi og ábyrgð, opnast möguleiki á samfélagi þar sem bæði fólk og jörðin geta dafnað. Slík velgengni er ekki aðeins sjálfbær, hún er forsenda góðs lífs,“ sagði Dóra Guðrún Guðmundsdóttir, forseti Velsældarþingsins og sviðsstjóri hjá Embætti landlæknis.
Auk forseta og Jesper Brodin, tóku Olivier De Schutter, sérstakur ráðgjafi Sameinuðu þjóðanna um fátækt og mannréttindi, Nicola Sturgeon, fyrrverandi forsætisráðherra Skotlands, Sandrine Dixon Declève, forseti Club of Rome, Katrín Jakobsdóttir fyrrverandi forsætisráðherra, Hanna Birna Kristjánsdóttir stjórnarformaður Reykjavik Global Forum og Sophie Howe, fyrsti fulltrúi framtíðarkynslóða Wales, þátt í þinginu.
Í tengslum við Velsældarþingið heimsótti forseti Slóveníu, Natasa Pic Musar, landið og fundaði með forseta á Bessastöðum. Þær ræddu einnig saman á opnum viðburði í Veröld, húsi Vigdísar, undir yfirskriftinni: The Courage to Care: Leadership in a Changing World.
Forseti er verndari Velsældarþings.
Halla Tómasdóttir, forseti Íslands, og Jesper Brodin, stjórnarformaður The B Team og fyrrverandi forstjóri IKEA ræddu um leiðtogahæfni og velsæld á tímum gervigreindar.
Fleiri fréttir
16. apríl 2026
„Stjórnmál eru list málamiðlunarinnar“
Forseti Íslands í samtali við forseta Slóveníu í Veröld.
16. apríl 2026
„Stjórnmál eru list málamiðlunarinnar“
15. apríl 2026
„Við leyfðum okkur að dreyma um framtíðina“
Tvíhliða fundur forseta Slóveníu og forseta Íslands á Bessastöðum.
15. apríl 2026
„Við leyfðum okkur að dreyma um framtíðina“
14. apríl 2026
Kærleiksríkt hugrekki
Forsetar Íslands og Slóveníu ræða forystuhlutverk í breyttum heimi.
14. apríl 2026
Kærleiksríkt hugrekki