„Við stöndum með þér, þú ert ekki ein“
3. september 2026
Ljósmyndari: Þórir Benedikt Björnsson.
Forseti viðstödd opnun nýs Kvennaathvarfs.
Linda Dröfn Gunnarsdóttir, framkvæmdastýra Kvennaathvarfsins, flytur ávarp sitt við opnuna.
SKJÓL er sérhönnuð íslensk prjónauppskrift sem gegnir þreföldu hlutverki í starfsemi Kvennaathvarfsins.
Sjá nánar.
Forseti var viðstödd opnun nýs Kvennaathvarfs og flutti þar stutt ávarp. Nýja húsið er helmingi stærra en það húsnæði sem athvarfið hafði áður til umráða. Þar er líka betri aðstaða til að taka á móti konum og börnum með fatlanir. Meðal annarra gesta við opnunina voru Ragnar Þór Ingólfsson félags- og húsnæðismálaráðherra, Hildur Björnsdóttir borgarstjóri og Eliza Reid, fyrrverandi forsetafrú.
Kvennaathvarfið býður upp á öruggt skjól fyrir konur og börn sem flýja þurfa ofbeldi, ásamt því að bjóða uppá ráðgjöf og stuðning fyrir konur sem eru þolendur ofbeldis í nánum samböndum. Samtök um kvennaathvarf, sem voru stofnuð árið 1982, hafa á liðnum árum staðið fyrir fjársöfnun vegna nýja hússins. Alls söfnuðust um 600 milljónir króna, bæði frá almenningi og fyrirtækjum, en einnig hafa ýmsir aðilar gefið vinnu og húsbúnað. Um 30 milljónir söfnuðust í kringum átakið Rjúfum mynstrið og sölu á prjónauppskriftinni SKJÓLI sem Tinna Laufdal hannaði. Forseti, framkvæmdastýra Kvennaathvarfsins og fleiri gestir klæddust þessari fallegu flík við opnunina.
Í ávarpi sínu sagði forseti að saga Kvennaathvarfsins væri „saga einstakrar úrræðasemi og samstöðu kvenna. Fyrir rúmum fjörutíu árum tóku konur höndum saman um að skapa úrræði þar sem engin voru til. Þær fundu leiðir þegar kerfin brugðust. Konur stigu fram til að hjálpa öðrum konum og studdu þær sem áttu í engin hús að venda. Við stöndum með þér, þú ert ekki ein – það eru ómetanleg skilaboð.”
Í niðurlagi ávarpsins sagði forseti ennfremur: „Þetta fallega hús er tákn um hvernig samfélag við viljum byggja: Samfélag sem styður þolendur af hlýju og virðingu. Samfélag sem horfist í augu við vandann, styður forvarnir og dregur gerendur til ábyrgðar. Framtíðarsamfélag þar sem ofbeldi gegn konum og börnum er ólíðandi. … Ég vona að þið haldið áfram að berjast gegn kynbundu ofbeldi og að þið haldið áfram að styðja og skjóta skjólshúsi yfir konur og börn sem ekki er vært heima hjá sér. En ég vona líka að skjólstæðingum ykkar fækki. Að sífellt færri konur og börn þurfi að grípa til þess örþrifaráðs að flýja heimili sín. Að okkur takist sem samfélagi að uppræta vandann. Við getum gert betur.“
Fleiri fréttir
2. september 2026
Bláa lónið og Alfreð Gíslason heiðruð á Bessastöðum
Forseti afhendir Útflutningsverðlaun forseta Íslands 2026.
2. september 2026
Bláa lónið og Alfreð Gíslason heiðruð á Bessastöðum
31. ágúst 2026
Sólrík söngstund á Bessastöðum
Stiklur úr dagbók forseta.
31. ágúst 2026
Sólrík söngstund á Bessastöðum
28. ágúst 2026
Samúðarkveðja til Noregs
Forseti sendir Hákoni VIII samúðarkveðjur vegna andláts Haraldar V.
28. ágúst 2026
Samúðarkveðja til Noregs