Gervigreind til góðs
„Gervigreind getur orðið eitt öflugasta tæki okkar til að bæta heilsu, menntun, fæðuöryggi og viðbrögð okkar við umhverfisáskorunum. En áhrif hennar ráðast ekki af tækninni einni saman. Þau ráðast af þeim ákvörðunum sem við tökum varðandi vald, aðgang og ábyrgð.“
Forseti hefur lagt ríka áherslu á að þróun stafrænnar tækni, gervigreindar og starfsemi samfélagsmiðla þurfi að þjóna almenningi en ekki öfugt. Vorið 2026 efndi hún til samtals á Bessastöðum með sérfræðingum úr tæknigeiranum og opinberri stjórnsýslu til að ræða um áhrif gervigreindar á samfélagsþróun og þau tækifæri og hættur sem í henni felast. Í kjölfarið sótti hún alþjóðlegar ráðstefnur um gervigreind sem Sameinuðu þjóðirnar (SÞ) og fleiri aðilar skipulögðu í Genf í Sviss.
Í ávarpi á Heimsþingi um gervigreind til góðs (The AI for Good Global Summit) í Genf lagði forseti áherslu á að margir aðilar þyrftu að taka höndum saman til að móta umgjörð fyrir þær tækniframfarir sem væru að umbylta lífi einstaklinga og þróun samfélaga. Hún bætti við að brýnt að ungt fólk hefði einnig aðkomu á stefnumótun á þessu sviði. „Ekkert eitt land getur stjórnað þessari tækni upp á sitt einsdæmi. Ekkert eitt fyrirtæki getur aflað sér trausts upp á eigin spýtur. Og það er ekki hægt að ætlast til þess að ein kynslóð þurfi að axli ábyrgð á ákvörðunum sem hún á engan þátt í að móta.”
Við sama tækifæri tók hún sæti í alþjóðlegri ráðgjafanefnd SÞ um gervigreind til góðs (AI for Good Global Commission). Í hópnum eru þjóðarleiðtogar, ráðherrar, stjórnmálafólk og fulltrúar atvinnulífs, alþjóðastofnana og félagasamtaka. Ráðið er undir forystu Paul Kagame forseta Rúanda, Marc Benioff forstjóra Salesforce og Doreen Bogdan-Martin framkvæmdastjóra ITU. Meðal annarra sem sitja í nefndinni eru Alar Karis forseti Eistlands, Brad Smith forstjóri Microsoft, Julie Sweet forstjóri Accenture, tónlistarmaðurinn William Adams (will.i.am), Josephine Teo ráðherra upplýsingamála í Singapúr og Emma Theofelus ráðherra upplýsingamála í Namibíu. Verkefni nefndarinnar er að fjalla um tæknileg, samfélagsleg og efnahagsleg álitamál sem tengjast gervigreind og gera tillögur um stefnumótun á þessu sviði.
