Forseti setur viðskiptaþing og heimsækir fyrirtæki með íslensk viðskiptatengsl í Tbilisi auk vatnsaflsstöðvar sem reist var í íslensk-georgísku samstarfi. Viðburðirnir voru hluti af dagskrá þriggja daga opinberrar heimsóknar forseta og sendinefndar til Georgíu.
Í sendinefnd forseta voru Guðlaugur Þór Þórðarsson, umhverfis-, orku og loftslagsmálaráðherra, og Nótt Thorberg, forstöðumaður Grænvangs, en auk þeirra fylgdi forseta fjöldi fulltrúa úr viðskiptalífinu. Markmiðið var að kanna möguleika á auknu samstarfi við uppbyggingu endurnýjanlegrar orku m.a á sviði beinnar nýtingar jarðvarma, vatnsaflsvirkjana og fjárfestinga í loftslagslausnum.
Á þriðja degi heimsóknarinnar var haldið í vettvangsferð í héraðið Samtskhe–Javakheti þar sem vatnsaflsstöðin Akhalkalaki var skoðuð. Stöðin er að hluta í eigu íslensku verkfræðistofunnar Verkís og Landsvirkjun Power, dótturfélags Landsvirkjunar, og fylgdu fulltrúar beggja fyrirtækja forseta til Georgíu.
Vatnsaflsstöðin hóf starfsemi í nóvember 2022 en þetta er fyrsta fjárfesting Landsvirkjun Power utan landsteinanna sem reist er og sett í rekstur og sér hún um 30.000 heimilum fyrir rafmagni. Tilgangur Landsvirkjunar Power er að flytja út sérþekkingu Íslendinga á sviði endurnýjanlegrar orkuvinnslu og stuðla þannig að orkuskiptum erlendis.
Viðskiptahringborð og fyrirtækjaheimsóknir
Á öðrum degi hinnar opinberu heimsóknar var efnt til viðskiptaþings þar sem fulltrúar úr georgíska og íslenska orkugeiranum réðu ráðum sínum. Guðlaugur Þór, umhverfis-, orku- og loftslagsmálaráðherra, leiddi viðburðinn ásamt Levan Davitashvili, efnahags- og sjálfbærniráðherra Georgíu, en forseti flutti opnunarávarp.
Forseti, ráðherra og sendinefndir heimsóttu jafnframt tvö fyrirtæki í Tbilisi sem eru með íslenska samstarfsaðila og hafa viðskiptatengsl við Ísland, annars vegar CreditInfo og hins vegar Cerberus Frontier, sem er samstarfsaðili Landsvirkjunar.