Forseti tekur á móti nýjum sendiherra Þýskalands, Dietrich Becker, sem afhendir trúnaðarbréf sitt á Bessastöðum. Rætt var um traust samskipti Íslands og Þýskalands, nýlega heimsókn Þýskalandsforseta til Íslands og sameiginlegar áskoranir sem bíða Íslendinga og Þjóðverja í bráð og lengd, ekki síst á sviði loftslagsmála. Þá var rætt um möguleika á auknu samstarfi við nýtingu jarðhita í Þýskalandi og leiðir til að efla menningartengsl ríkjanna. Að lokinni afhendingu trúnaðarbréfs bauð forseti til móttöku fyrir embættismenn og aðra sem sinna samskiptum Íslands og Þýskalands.