Forseti sækir minningarstund í Hafnarfjarðarkirkju og flytur þar ávarp. Um þessar mundir eru 65 ár liðin frá fjórum hörmulegum sjóslysum hér við land og víðar á Norður-Atlantshafi. Dagana 30. janúar til 18. febrúar 1959 fórust 153 manns, 95 með Grænlandsfarinu Hans Hedtoft, 16 með kanadíska togaranum Blue Wave, 30 með togaranum Júlí frá Hafnarfirði og 12 með vitaskipinu Hermóði.
Auk forseta flutti biskup Íslands, Agnes M. Sigurðardóttir, hugvekju og kveikt var á kertum til minningar um þá sem hlutu vota gröf. Sendiherra Danmerkur, sendifulltrúar Færeyja og Grænlands og fulltrúi sendiráðs Kanada sóttu viðburðinn auk ættingja þeirra Íslendinga sem fórust með Hermóði og Júlí og annarra kirkjugesta.
Að minningarstundinni lokinni var opnuð sýning í safnaðarheimili kirkjunnar um sjóskaðana fyrir 65 árum. Sr. Þorvaldur Karl Helgason og Egill Þórðarson loftskeytamaður höfðu veg og vanda af henni.